'kute'

mi wile lukin sin e kepeken pi nimi 'kute'

mi weka tan kulupu pi toki pona. tenpo kama la, mi wile kama sin. tenpo ni la, mi kama sin ala. taso mi wile toki e pilin mi.

tenpo pini la, mi toki e ni: “mi jan pi kute meso. ‘kute meso’ li nimi pona taso tawa mi.” tenpo ni la, mi pilin ante. tenpo ni la, mi toki e ni: “mi jan pi kute meso anu jan pi kute ale ala.”

majuna la;

tenpo pini la, mi kepeken e nimi ni e kon ni: 

• jan kute - jan ni li kute e kalama ale.

• jan pi kute ala / jan kute ala - jan ni li kute e kalama ala.

• jan pi kute meso - jan li lon meso pi ona tu.
  
  

sitelen ni la, mi wile kepeken nasin ni. tenpo kama la, mi wile kepeken nasin sin.

taso... nasin ni li pilin ike lili tan ni: nasin kute pi ike pi kute ala. ni li seme? ni li nasin li ike tawa jan pi kute ala / jan pi kute meso. nasin ni la, kute li pona, kute ala li ike. nasin ni la, jan kute o nasin kute o toki uta. nasin kute pi ike pi kute ala li lawa e jan pi kute ala e jan pi kute meso. 

tenpo pini la, mi weka e nimi ‘kute (pi) pona ala’ e nimi ‘kute ike’ e nimi ‘kute pakala’ tan ni: mi wile weka nasin kute pi ike pi kute ala. kute meso / kute ala li ike ala li pona ala ala li pakala ala! mi pakala ala. taso nasin mi li awen ike lili.

kute en kute ale li sama ala. kute li lon. jan ala pi mute lili lili lili lili li kute e kalama ala. jan ni li lon a, taso jan mute pi ‘kute ala’ li kute e kalama li kute ala e kalama kepeken. ona li ken ala sona e toki uta. kin la, mi jan pi kute meso li kute. mi kute ala e kalama ale. taso mi mute. kin kin la, ilo kute li lon li ken suli e kalama. ona li weka e ilo la, ona li awen kute ala. taso kute li lon. kin kin kin la, kalama pi insa lawa taso li lon. mute suli pi jan pi kute ala en mute suli pi jan pi kute meso li kute e insa lawa taso. ni li kalama… li kute!

namako la;

ni ale la, tenpo ni la, mi kepeken e nimi ni e kon ni:

• jan pi kute ale - jan ni li kute e kalama ale.

• jan pi kute ale ala - jan ni li kute ala e kalama ale.

• jan pi kute ala - jan ni li kuta ala e kalama.

nasin ni li weka e nimi ku e nimi sin. ni la, ona li pona tawa sona. jan li ken lukin (anu kute, a a a) e nimi ni li ken sona e kon ona.

taso, o nasin ni la, o lukin e ni: en jan pi kute ala en jan pi kute ale ala li ken sama. jan pi kute (ale) ala li ken anu e nimi ona.

taso mi kepeken kin e nimi nasa ni e kon nasa ni e nasin ni;

• jan pi kute lili - jan ni li kute lili e kalama.

• jan pi kute meso - jan pi kute ale ala en jan pi kute lili. (ale - meso - ala) 

• jan pi kute nasa - kute pi jan ni li lon poki ante anu lon poki mute. 

• jan luka / jan pi toki luka - jan ni li ken toki luka li wile toki luka.

• jan pi toki uta ala - jan ni li ken ala toki uta.

• jan pi nasin kulupu pi kute ala/ante* - nasin pi jan ni li kama tan jan pi kute ala li pona tawa jan pi kute ante. ona li lon kulupu pi jan pi kute ala.

• jan pi kute ante* - jan ale pi kute ale ala.

*ni li sin a lon toki mi! mi pilin ale ala e ona. ken la, mi o ante anu o weka e ona.

mi jan pi kute ale ala. mi jan pi kute ante. mi jan pi kute nasa. mi jan pi kute meso. mi jan luka. mi wile nasin kulupu pi kute ala lon tenpo kama la, mi kama sona, mi kama tawa kulupu.

mi lawa ala e nimi. jan ante li ante. jan li kepeken nasin ante. jan li toki e ni: “mi jan pi kute pakala” la, mi toki e ni: “ona jan pi kute pakala”. jan li anu e nimi ona. mi sona e nasin ona la, mi kepeken nasin ona lon ona. mi sona ala anu ken ala toki tawa ona e wile ona anu ona li toki pona ala la, mi kepeken nasin mi lon ona.

tenpo kama la, mi wile kepeken mute e nimi 'kule' lon kute. taso tenpo ni la, mi kepeken ala e ona. mi o musi o toki o lukin o alasa.

ni li pilin mi. sina lukin e ona ale la, sina pona. mi wile kama sona e nasin ante. mi wile kama pona! :) nanpa wan la, mi pini e ni lon 16/10/21. mi ante lili e ona lon 14/01/22.