luka pona li seme?

luka pona li seme?

 

mi kama sona e toki pona la, mi lukin e toki ni: "toki pona li jo e toki luka. ona li toki pona luka". ni li pona a tawa mi tan ni: mi jan pi kute meso (kute mi li lon taso li pona ala). tan ni la, toki luka li pona tawa mi. mi sona e toki luka pi ma Pitan. taso mi lukin e toki pona luka la, mi pilin e ni: ona li pona ala.

tan ni la, mi ante e ona. taso ante mute li kama. toki sin li kama. ni li luka pona.

 

toki pona en luka pona li sama ala sama?

ona tu li ante li toki ante. 

nimi li sama. nimi 'li' en nimi 'e' li lon ala, taso nimi ante ale li lon. nimi ante li ken weka lon wile pi jan toki.

taso nasin toki li ante mute. 

kin la, luka ijo li lon!

luka pona en toki pona o ante tan seme?

toki pona li toki uta. ni la, ona li kepeken mute e nasin toki pi toki uta. nasin toki pi toki uta en nasin toki pi toki luka li ante. mi la, luka pona li pona tawa toki pi toki luka.

 

jan ante o luka pona sama anu seme? 

ala! jan li ken jo enasin ante! luka pona lon lipu ni li luka pona pi mi taso! sina wile la, luka pona sina li ken ante. luka pona li ken ante lon luka ante.

mi jo e nasin toki e nimi luka. ni li pona tawa mi. ona li pona ala tawa sina la, o ante e ona lon nasin sina.

 

luka pona en toki pona li lon poka tan seme? sina pali ala e toki luka sin ante tan seme?

mi wile e ni: toki pona en luka pona li lon poka li lon kulupu wan li toki poka. mi wile e ni tan ni: toki pona li jo e kulupu. ni la, jan pi toki luka lon kulupu ni li ken toki luka e toki poka pi toki pona. kin la, mi wile e ni: jan li ken ante toki kepeken wawa lili taso e luka pona e toki pona.

jan pi mute seme li luka pona?

mi toki mute lon ona. ona li toki mi. taso jan ante pi mute lili li toki e ona. mi en jan pona li toki lon tenpo mute. sina wile toki la, mi lon ma pona pi toki pona lon ilo Siko.

sina seme?

mi jan Olipija :)

nasin toki pi luka pona

lipu pi nimi luka pi luka pona

lipu pi luka ijo