toki pona li kama seme?
toki pona li kama seme?
toki pona li toki pona la, ona li toki li pona. toki la, kulupu li lon li toki la, jan lon kulupu toki li namako (ante) e toki la, ona li kama namako li kama sin. pona la, nasin li lon toki pona la, jan li namako mute ala e ona la, ona li awen. ni tu li utala la, mi isipin...
jan pi mute lili li toki e ni: 'mi toki kule e jan pi lon ala la, ona li toki pona la, toki pona li kama ni. kalama pi toki pona li kama ante. mute nimi pi toki pona li kama suli.' toki kule ale ni li musi... taso li lon ala.
toki ante la, jan li toki e ona la, toki li kama namako kepeken nasin ala. taso nasin li lon toki pona la, nasin ni li nasin e kama namako pi toki pona. nasin pi toki pona li ni: o pona. pona la, toki pona li lili li pona tawa jan. mute nimi ona li lili. kalama ona li lili. nasin toki ona li pona. ona li namako e nasin insa jan li ante tan toki lon (li toki Inli ala). ni ale li awen lon la, ni li nasin e namako pi toki pona.
kin la, en pu en ku li lon. ni la, tenpo ale la, jan li ken lukin e ona li kama sona e toki pona pu e toki pona ku.
ni ale la, mi alasa e kama pi toki pona.
nimi
jan mute li toki e ni; "mute nimi pi toki pona li kama suli". mi toki ante. mi la, kama li ni:
- en tenpo lon en tenpo kama pi sike ~20 la, mute nimi li kama suli. en nimi 'tonsi' en nimi 'meso' en nimi ku en nimi nu (pu nanpa tu wan, a a a) li kama pona. ni la, toki pona li kama e nimi 200
- tenpo kama pi sike ~40 la, toki pona li weka e nimi. en nimi 'meli' en nimi 'mije' en nimi 'tonsi' li weka. kon pi nimi mute li kama lon nimi wan taso. ni li tan seme? jan li pilin e ni; en nimi pu en nimi ku en nimi nu li majuna la, toki pona li wile kama namako li wile kama pona la, ona li pona e toki pona li lili e toki pona.
- tenpo kama pi sike ~80 - ~100 la, toki pona li kama tu; en toki pona pi nimi mute en toki pona pi nimi lili. toki pona pi toki pona majuna. toki wan li lon, taso nasin tu li lon. jan ale pi toki pona li ken lon nasin tu li toki e nasin pi pona ona. jan li wile pona la, ona li toki e toki pona lili. jan li wile toki e ijo suli e kon la, jan li toki e toki pona suli. toki pona lili li nimi 100(-). toki pona suli li nimi 200(+). ken la, tenpo mute la, jan li toki e toki pona meso.
- mi sona ala e tenpo la, jan li sitelen wawa li toki uta wawa la, jan li pana e nimi pi toki pona ala lon toki pona li toki nasa e ona. toki pona pi toki mute (creole) li kama lon. ona li lon tenpo lon, taso tenpo kama la, ona li kama suli.. en toki pona en toki Inli en toki Sonko en toki Nijon en toki mute a li lon toki ni, taso toki pona li suli a lon ona. toki Inli li suli nanpa tu. kalama pi nimi pi toki ante li kama sama lili taso. wan taso la, nimi pi toki Sonko li weka e kule kalama suli lili ona.
- tenpo ni ale la, toki pona pi poka lili li kama ante. tu taso la, en toki pona pi ma Sonko en toki pona pi ma Anku li kama ante tan ni: tenpo mute la, ona li kulupu lon kulupu ona li toki ala tawa jan pi kulupu ante. kulupu lili ante la, toki pona li kepeken nimi majuna li kepeken nimi sin ona.
nasin toki
toki pona la, jan li isipin mute li toki mute e nasin toki. ona li weka e nasin toki ike li toki e nasin toki pona. ona li namako e toki pona ona. ni la, mi la, toki pona li kama namako a. toki pona li kama ante mute tan toki ante.
- toki pona ale la, mi sona ala e tenpo la, nimi 'en' li kama suli li nimi pi nimi ijo pali. en nimi 'en' en nimi 'li' en nimi 'e' li kama suli sama.
- ni la, nimi 'en' li kama suli la, nasin toki pi toki pona li kama telo. ni la, en nimi ijo pali en nimi pali en ijo kama li ken lon tenpo ale lon toki. nasin toki pi mute lili li kama suli. ken la, en SVO en SOV en VOS li kama suli.
- toki pona pi toki mute li kama lon la, nasin toki ona li nasa. wan taso la, jan li toki mute e nimi 'msa' e nimi pi nasa sama.
- toki pona lili la, nasin toki li lili kin. en nimi 'lon' en nimi 'kepeken' en nimi 'tan' en nimi pi kule sama li weka li wan taso. nimi lu taso a li lon a a a! ken la, nimi 'la' taso li lon.
- toki pona suli la, en nasin toki pi toki pona suli en nasin toki pi toki pona pi tenpo lon li sama kule li ante lili taso. ken la, nimi lili mute pi nasin toki taso li lon.
- toki pona pi poka lili la, nasin majuna li lon. ona li kepeken e nasin pi kama sona lon toki ona, lon ma ona. ma Sonko li lon linluwi ante la, ona li ken kama sona e toki pona pu taso la, nasin toki ona li pu. nasin kama sona pi jan Pije li lon toki Anku la, nasin toki ona li nasin Pije. poki lili ante la, ante li lon. taso ken la, ona li namako e toki kepeken nasin ona. mi sona pona ala e toki Sonko e toki Anku... taso ken la, ona li nasin toki Sonko anu nasin toki Anku e toki pona.
kalama en sitelen
mi la, kalama pi toki pona li kama ante mute ala li awen.
- toki pona ale la, kulupu pi toki pona li kama suli la, jan tan ma ante li kama sona e toki pona. ni la, jan li toki uta e toki pona lon nasin ante. toki pona pi tenpo lon la, ni li lon. taso tenpo kama la, ni li kama suli.
- toki pona lili la, ona li weka e kalama mute e sitelen lili Lasin mute. jan li lukin e toki Lotoka e toki Pilaja la, kalama li lon ala toki ni la, ona li weka. en kalama /e, o, w, j, s/ li weka. ken la, kalama /a/ anu kalama /u/ li weka. jan li ken kalama /h/ e kalama /l/. ni la, en kalama /p, t, k, l, m, n, a, i/. kina la, taki pana pana li pana ala pana?
- toki pona pi toki mute la, ken la, nimi pi toki pona li kama namako. nimi 'kepeken' li kama nimi 'kepken'. sitelen la, ona li kama nimi 'kpk'.
- toki pona suli la, kalama en sitelen li awen. sitelen pona li kama suli.
- toki pona pi poka lili la, mi sona ala a! ken la, sitelen pi kulupu ni li kama lon. wan taso la, tenpo lon la, kulupu pona pi ma Nijon li sitelen e toki pona kepeken nasin pona tawa ona li kepeken e sitelen Ilukana e sitelen Katakana e sitelen Kansi.
luka pona
luka pona li toki luka pi kulupu pi toki pona.
- kulupu pi luka pona li kama suli. jan mute li kama sona e toki pona la, en jan pi kute ala en jan pi toki uta ala en jan luka ante li kama sona e toki pona la, ona li wile toki luka. ni la, ona li toki e luka pona.
- nimi luka sin li kama tawa nimi sin li kama tawa nimi majuna.
- luka pona li kama e nimi luka sin tan toki luka ante. tenpo lon la, nimi luka mute li kama tan toki luka pi ma Mewika, tan toki luka pi ma Piten. kulupu pona li lon ma ale li toki e toki mute li wile sona e nasin pi toki mute li wile pona. ni la, ona li namako e luka pona kepeken sona ona, kepeken alasa ona.
- ken la, luka pona li kama tu. en luka pona nimi en luka pona sitelen. tenpo lon la, luka pona li luka pona nimi. ni la, jan li toki e ijo la, ona li toki luka e nimi kepeken nimi luka, kepeken nasin toki luka. taso toki luka la, sitelen kon li lon. ni la, jan li toki luka e nimi ala e sitelen lon kon. luka li ijo anu sijelo pi ijo ni anu kepeken pi ijo ni. ni li toki la, nasin li lon. taso, nasin pona la, ken la, jan li wile weka ale e nimi li sitelen kon. nasin toki ni li ken taso toki e ijo lon. jan li wile toki e ijo suli e kon la, jan li toki e luka pona nimi.
- keeeeen la, jan li sitelen e luka pona....
pini
tenpo kama suli pi sike 100+ la, mi ken ala alasa ala e ni. ken la, jan ante li wile alasa! ken la, en ni mute anu ni ale li kama lon ala. taso mi lukin e pilin wile pi jan lon la, mi pilin e ni: toki mi pi tenpo kama li lon. ni ale la, toki pona li toki pona :)
Comments
Post a Comment